Əfran İsmayılov: Azərbaycan millisi Lixtenşteynə qalib gələ bilər

Azərbaycan millisi UEFA Millətlər Liqasının D Liqasının 2-ci qrupunda Lixtenşteynlə səfər oyununda qələbə qazana bilər. Millinin sabiq futbolçusu Əfran İsmayılov qarşılaşma ilə bağlı fikirlərini bölüşüb.

38 yaşlı keçmiş yarımmüdafiəçi komandaya uğurlar arzuladığını və səfərdə layiqli qələbəyə ümid etdiyini deyib. O, futbolçuların rəqibdən asılı olmayaraq ürəkli və istəkli oynamalı olduğunu vurğulayıb.

İsmayılov bildirib ki, üç xal Azərbaycan millisinə qrupu birinci pillədə başa vurmaq imkanı verəcək. O, Bakıdakı görüşdə Lixtenşteynə qalib gələ bilmədiklərini, buna baxmayaraq, çoxsaylı qol epizodları yaratdıqlarını qeyd edib.

“Futbolda belə hallar yaşanır. Bu dəfə qələbə qazanmalıyıq. Komandamız üçün rahat qalibiyyət də ola bilər”, – deyə sabiq futbolçu bildirib.

Vadutsda keçiriləcək Lixtenşteyn – Azərbaycan oyunu Bakı vaxtı ilə saat 23:45-də başlayacaq.

Kontekst

Noyabrın 12-də Ağasəlim Mircavadov Lixtenşteynlə oyunda Azərbaycan millisindən qələbə gözlədiyini bildirib. O, əvvəlki qarşılaşmada 90 dəqiqə ərzində üstünlüyün Azərbaycan millisində olduğunu deyib.