OMM Redaksiyası
AFFA Məşqçilər Komitəsinin üzvü Ağasəlim Mircavadov UEFA Millətlər Liqasında keçiriləcək Lixtenşteyn – Azərbaycan oyunu ilə bağlı fikirlərini bölüşüb.
O, komandadan yalnız qələbə gözlədiyini deyib və rəqibi doğma meydanda məğlub edə bilməməyi təsadüf kimi qiymətləndirib. Mircavadovun sözlərinə görə, əvvəlki qarşılaşmanın 90 dəqiqəsi ərzində üstünlük Azərbaycan millisində olub və rəqibə ciddi imkan verilməyib. Həmin oyunda yaranan həyəcanın nəticə çıxarmaq üçün dərs olduğunu qeyd edib.
Mütəxəssis qarşılaşmada daha sakit və təmkinli oynamağın, fürsətlərdən maksimum yararlanmağın vacibliyini bildirib. Lixtenşteynin süni örtüklü meydançasının üstünlük yarada biləcəyini desə də, Azərbaycan futbolçularının da belə meydanda oynamağa alışdığını və bu amilin oyuna ciddi təsir edəcəyini düşünmədiyini söyləyib. Onun fikrincə, komanda topa daha çox sahib olmalı və oyunun gedişinə nəzarət etməlidir. Qələbə qazanılmasa belə, bunu faciə saymaq düzgün olmaz; əsas komandanın meydanda əlindən gələni etməsidir.
Mircavadov AFFA-nın təlim-məşq prosesini və səfərləri yüksək səviyyədə təşkil etdiyini, lazımi şəraitin yaradıldığını bildirib. O, klubların da yerli futbolçulara, xüsusən gənc və perspektivli oyunçulara şans verməli olduğunu vurğulayıb.
Lixtenşteyn – Azərbaycan oyunu noyabrın 13-də Vaduts şəhərində keçiriləcək və Bakı vaxtı ilə saat 23:45-də başlayacaq.
