OMM Redaksiyası
Avropa Siyasi Birliyinin doqquzuncu sammiti noyabrın 12-də Dublində keçirilir. AnewZ-nin məlumatına görə, Avropa liderləri təhlükəsizlik, müdafiə, enerji əməkdaşlığı və iqtisadi dayanıqlılığı, eləcə də Azərbaycanın regional sülh və əlaqəlilikdəki rolunu müzakirə edirlər.
Azərbaycan Prezidenti İlham Əliyev Dublin Konqres Mərkəzində keçirilən sammitin açılış plenar iclasında iştirak edib. Onu İrlandiyanın baş naziri Maykl Martin qarşılayıb.
Maya Sandu Azərbaycanla enerji əməkdaşlığına maraq göstərib
Moldova Prezidenti Maya Sandu Azərbaycanla münasibətlər, xüsusilə enerji təhlükəsizliyi, siyasi və iqtisadi əməkdaşlıq barədə sualları cavablandırıb. O, İlham Əliyevlə görüşünün nəzərdə tutulduğunu və ölkəsinin Azərbaycanla enerji sahəsində əməkdaşlıqda maraqlı olduğunu deyib.
“Enerji hamımız üçün, xüsusilə Moldova üçün böyük problem olaraq qalır”, – Sandu bildirib. O, ölkəsinin son illərdə enerji təchizatını şaxələndirmək və Rusiyadan asılılığı azaltmaq üçün əhəmiyyətli islahatlar apardığını qeyd edib.
“Ümid edirik ki, bu gün yaxşı müzakirə aparacaq və həll yolları tapacağıq”, – Moldova Prezidenti əlavə edib.
Azərbaycanla Ermənistan arasında sülh prosesi barədə suala cavabında Sandu deyib: “Bütün ölkələrimizdə sülh olmasını istəyirik və təbii ki, sülhə aparan istənilən müzakirəni və səyi alqışlayıram”.
Alen Berse Ukraynada sülh və hesabatlılığın vacibliyini vurğulayıb
Avropa Şurasının baş katibi Alen Berse Avropada sülhün, sabitliyin və təhlükəsizliyin əhəmiyyətini vurğulayaraq daha güclü əməkdaşlığa, əlaqəliliyə və demokratik dəyərlərə ehtiyac olduğunu bildirib. O, sammitdə Avropa Şurasının 46 üzv dövlətini bir araya gətirmək və vahid hüquqi məkanı qorumaq rolunu qeyd edib.
“Sülh və sabitliyə nail olmaq üçün düşünürəm ki, güclü, əlaqəli və təhlükəsiz olmalıyıq”, – Berse deyib.
Ukraynadakı müharibəyə toxunan baş katib Avropada davamlı sülhün ədalət və hesabatlılıq olmadan əldə edilə bilməyəcəyini vurğulayıb: “Ukraynada uzunmüddətli və davamlı sülh olmadan Avropada təhlükəsizlik və sabitlik olmayacaq. Ədalət olmadan sülh, hesabatlılıq olmadan ədalət olmaz”.
Berse hesabatlılıq mexanizmlərinin yaradılması istiqamətində davam edən səylərə də diqqət çəkib. “Avropa demokratiyanı tərksilah etmədən, öz dəyərlərimizi zəiflətmədən yenidən silahlanmalıdır. Çünki hökumətlər dəyişir, silahlar qalır və insanları hakimiyyətdə olanlardan yalnız demokratiya qoruya bilər”, – o bildirib.
