OMM Redaksiyası
Ed Şiran Makklemorun ABŞ turnesindən çıxarılması ilə bağlı açıqlama verib. Müğənni bildirib ki, qərarı o deyil, turnenin promouterləri və konsert məkanlarının rəhbərləri qəbul edib.
Makklemor Şiranın “Loop Tour” turnesinin qalan səkkiz konsertində xüsusi qonaq kimi çıxış etməli idi. Lakin promouter “Messina Touring Group”un məlumatına görə, bir neçə məkan onun proqramda qalacağı təqdirdə konsertlərə ev sahibliyi etməyəcəyini bildirib.
Mübahisə Makklemorun sentyabrın 4-də Nyu-Cersidəki “MetLife Stadium”da çıxışından sonra yaranıb. O, ABŞ stadionlarında “Fələstini azad edin” şüarını səsləndirmək və Qəzza ilə İordan çayının qərb sahilində yaşayan insanlarla həmrəyliyini ifadə etmək üçün turneyə qoşulduğunu deyib.
Şiran “Instagram”da yayımladığı açıqlamada İsrail-Fələstin münaqişəsindən dəhşətə gəldiyini və hər iki tərəfin yaşadığı iztirabları bəşəri faciə adlandırıb. O bildirib ki, məkanlar Makklemor açılış ifaçısı olaraq qaldığı müddətdə turneyə ev sahibliyi etməyəcəklərini təşkilatçılara çatdırıblar.
Müğənni məkan sahibləri, promouterlər və fəallar arasında müzakirələrə vasitəçilik etməyə çalışdığını, lakin çıxış yolu tapa bilmədiyini qeyd edib. “Makklemorun turnedən çıxarılması promouterin qərarı idi, mənim yox”, - deyə Şiran yazıb.
Şiran konsertlərini şəxsi siyasi mövqeləri üçün platformaya çevirməmək qərarını da müdafiə edib. O, ictimaiyyət qarşısında danışmamasının münaqişəyə laqeyd olduğu anlamına gəlmədiyini vurğulayıb.
Makklemor isə daha əvvəl “New England Patriots” klubunun sahibi Robert Kraftın onun turneydə iştirakına qarşı çıxaraq digər stadion sahiblərini də buna təşviq etdiyini bildirib. Kraft etirazının yəhudi icması üçün təhqiramiz hesab etdiyi daha geniş ritorika və təsvirlərlə bağlı olduğunu deyib. Makklemor antisemitizm ittihamlarını rədd edib.
Şiranın açıqlamasından sonra bəzi sənətçilər Makklemor və fələstinlilərlə həmrəylik məqsədilə turneni tərk etdiklərini elan ediblər. İrlandiyalı müğənni Aaron Rowe ABŞ üzrə qalan 10 konsertdən çəkildiyini və Qəzza ilə bağlı danışan sənətçilərin susdurulduğu şəraitdə turneni davam etdirə bilməyəcəyini bildirib.
Şiranla uzun illər çıxış edən İrlandiya qrupu “Beoga” da turneni tərk edib. Qrup üzvləri Fələstin hüquqlarını müdafiə etməyə sadiq qaldıqlarını açıqlayıblar.
Daha sonra Şiranın ilin sonunda Cənubi Amerikada keçiriləcək altı konsertində çıxış etməli olan Finneas da turnedən çəkilib. O, “Sənətçilər məzlumlar üçün danışanda susdurulmamalıdır. Mən Fələstin və onun xalqının yanındayam”, - deyə bildirib.
Danimarkanın “Lukas Graham” qrupu da müharibə və mülki şəxslərin öldürülməsi barədə sənətçilərin danışa bilməli olduğunu qeyd edərək turneni tərk etdiyini açıqlayıb.
