OMM Redaksiyası
YouTube-da MrBeast adı ilə tanınan Cimmi Donaldson oktyabrın 9-da Özbəkistanın paytaxtı Daşkəndə səfər edib. Bu, onun Mərkəzi Asiyaya ilk səfəri olub.
Donaldson Özbəkistanın İncəsənət və Mədəniyyətin İnkişafı Fondunun təşkil etdiyi fan tədbirinə qatılıb. 520 milyondan çox abunəçisi olan əsas YouTube kanalının müəllifi tədbirdə interaktiv oyunlarda, viktorinalarda iştirak edib və mükafatlar təqdim edib.
Tədbirdə iştirak etmək istəyənlər arasından qeydiyyat şərtlərinə uyğun şəxslər püşkatma ilə seçilib. İştirak yalnız 18 yaşdan yuxarı şəxslər üçün mümkün olub.
Daşkənd Müasir İncəsənət Mərkəzinin yaxınlığında ictimai fan zonası açılıb. Donaldson daha sonra “Instagram” hesabında izdihamın görüntülərini paylaşaraq Özbəkistanda videolarını bu qədər insanın izlədiyini bilmədiyini yazıb.
Daşkənddə çəkiliş zamanı MrBeast tapşırıqlarını yerinə yetirən üç iştirakçıya ümumilikdə 300 milyon som verib. Hər qalib 100 milyon som, təxminən 8 min dollar alıb. Donaldsonun çəkiliş heyətinin Səmərqənd, Buxara və Xivə də daxil olmaqla, Özbəkistanın digər şəhərlərinə getməyi planlaşdırdığı bildirilib.
Səfər zamanı diqqət çəkən məqamlardan biri MrBeastin heyətinin gətirdiyi qırmızı “Lamborghini” olub. Sosial şəbəkələrdə yayılan fotolarda avtomobilin cızıldığı və zədələndiyi görünürdü.
Hüquq-mühafizə orqanlarının nümayəndələri YouTuberin Daşkənddə yol-nəqliyyat hadisəsinə düşmədiyini və avtomobilin səfər boyu müşayiət olunduğunu bildiriblər. Donaldson isə “Lamborghini”nin Özbəkistanda deyil, Hindistanın Dehli şəhərində zədələndiyini deyib.
Səfər İncəsənət və Mədəniyyətin İnkişafı Fondunun Özbəkistanın Turizm Komitəsi ilə əməkdaşlığı çərçivəsində təşkil olunub. Təşkilatçılar tədbiri yerli yaradıcıları tanıtmaq və Özbəkistanı Donaldsonun geniş beynəlxalq auditoriyasına təqdim etmək imkanı kimi qiymətləndiriblər.
