DYP hava şəraiti ilə bağlı sürücülərə və piyadalara çağırış edib

Baş Dövlət Yol Polisi İdarəsi ölkə ərazisində müşahidə olunan əlverişsiz hava şəraiti ilə əlaqədar yol hərəkəti iştirakçılarına müraciət edib.

İdarədən "Operativ Məlumat Mərkəzi-OMM"-ə bildirilib ki, əvvəlcədən verilən xəbərdarlıqlara uyğun olaraq hazırda bir sıra şəhər və rayonlarda hava və yol şəraiti hərəkət iştirakçıları üçün çətinlik yaradır. Mövcud vəziyyətlə əlaqədar yol örtüyündə sürüşmə ehtimalının artdığı qeyd olunub.

Xüsusilə qar yağan ərazilərdə yolların daha sürüşkən olduğu vurğulanıb. Bu hal nəqliyyat vasitələrinin idarə edilməsini çətinləşdirir və yol-nəqliyyat hadisələrinin başvermə riskini yüksəldir.

Baş Dövlət Yol Polisi İdarəsi sürücülərə hərəkət zamanı maksimum diqqətli olmağı, öndə gedən nəqliyyat vasitələri ilə təhlükəsiz məsafə saxlamağı, müəyyən edilmiş sürət hədlərinə ciddi əməl etməyi tövsiyə edib. Eyni zamanda qəfil manevrlərdən çəkinmək və yol hərəkəti qaydalarına tam riayət etməyin vacibliyi diqqətə çatdırılıb.

Müraciətdə bütün yol hərəkəti iştirakçıları diqqətli davranmağa və qarşılıqlı anlayış nümayiş etdirməyə çağırılıb. Qeyd olunub ki, yol hərəkəti qaydalarına riayət və məsuliyyətli davranış mövcud risklərin qarşısının alınmasında əsas amillərdən biridir.