OMM Redaksiyası
“Real Madrid”in və İngiltərə millisinin yarımmüdafiəçisi Cud Bellinqem futboldan kənar həyatda özünü yetkin hiss etmədiyini deyib. O bildirib ki, futbol baxımından yetkin olduğunu düşünür, çünki artıq 400-ə yaxın oyun keçirib.
“Adi həyatda isə, açığı, hazırda özümü o qədər də yetkin hiss etmirəm. Yemək bişirməyi bacarmıram, avtomobil idarə edə bilmirəm. Məşğul olduğum işdə yaxşıyam, amma qalan məsələlərdə elə də yox”, – Bellinqem “Vogue”a açıqlamasında deyib.
İngiltərəli futbolçu gündəlik işlərində dostlarının və ailəsinin köməyinə arxalandığını bildirib. Onun sözlərinə görə, yemək bişirən, evi təmizləyən, anası və başqa yaxınları ona dəstək olurlar.
Bellinqem hər gün səhərdən axşamadək çox çalışdığını, evə qayıdanda isə bəzi sadə məişət bacarıqlarını öyrənmək fürsətini əldən verdiyini düşündüyünü söyləyib. Bununla belə, həmin bacarıqları mənimsəmək üçün uyğun vaxt və fürsətin hələ qarşıda olduğuna əmin olduğunu qeyd edib.
