Corcia Meloni: Aİ miqrasiya və enerji problemini həll etməlidir

"Miqrasiya məsələsinin həll edilməməsi avropalıların Aİ qurumlarına inamını azaldır".

"Operativ Məlumat Mərkəzi-OMM" xəbər verir ki, bu sözləri İtaliyanın Baş naziri Corcia Meloni deyib.

Onun sözlərinə görə, nəzarətsiz miqrasiya axınları vətəndaşların təhlükəsizliyi üçün problemlər yaradır və bu, həm iqtisadiyyata təsir göstərir, həm də sosial gərginliyi artırır.

Meloni bildirib ki, bu hallar Cənubi Aralıq dənizi ölkələri ilə əməkdaşlığa daha diqqətlə yanaşmağı zəruri edir.

İtaliyanın baş naziri vurğulayıb ki, qeyri-qanuni miqrasiya kanalları Aİ-nin enerji əməkdaşlığını genişləndirmək istədiyi ölkələrdə fəaliyyət göstərir:

"Bu səbəbdən Aİ ölkələri üçün bir neçə problem - miqrasiya, enerji və süni intellekt bir-biri ilə sıx bağlıdır. Vətəndaşlar ən vacib problemlərin həll olunmadığını görəndə, Aİ -yə inam azalır, insanlar manipulyasiyalara, o cümlədən süni intellekt vasitəsilə yaradılan təsirlərə daha həssas olur. Aİ ölkələri bu problemlərə birlikdə həll yolları tapmalıdır".