Ceymi Karraqer: "Bredli Barkola Məhəmməd Salahı əvəz edə bilməz"

İngiltərə millisinin və "Liverpul"un sabiq müdafiəçisi Ceymi Karraqer "PSJ"nin vingeri Bredli Barkolanın Mersisayd klubuna mümkün transferi ilə bağlı yayılan iddiaları dəyərləndirib.

“Operativ Məlumat Mərkəzi-OMM” xəbər verir ki, Karraqer fransalı futbolçunun Məhəmməd Salahın yerini doldurmaq üçün uyğun seçim olmadığını bildirib.

Sabiq müdafiəçi sosial şəbəkə hesabında paylaşdığı fikirdə Barkolanın əsasən sol cinahda çıxış etdiyini vurğulayıb.

"Barkola Salahı əvəz edə bilərmi? Xeyr, çünki o, digər cinahda oynamır. Komandada artıq sol cinahda çıxış edə biləcək üç futbolçu var – Virts, Qakpo və Nqumoa. Lakin sağ cinahı bağlayacaq heç kim yoxdur", – deyə Karraqer qeyd edib.

Xatırladaq ki, daha əvvəl mətbuatda Bredli Barkolanın "Liverpul" rəhbərliyi ilə transfer danışıqları apardığı barədə xəbərlər yayılmışdı.

Qeyd edək ki, 21 yaşlı futbolçu ötən mövsüm Fransa çempionatında keçirdiyi 29 oyunda 11 qol vurub və 1 məhsuldar ötürmə ilə yadda qalıb.