OMM Redaksiyası
Berlin əyalət seçkilərində Sol Partiya 25,5 faiz səslə qalib gəlib. İlkin nəticələrə əsasən, Xristian Demokratlar İttifaqı (CDU) 19,1 faizlə ikinci, sağçı Almaniya üçün Alternativ (AfD) 16 faizlə üçüncü, Sosial Demokrat Partiyası (SPD) isə 12,1 faizlə dördüncü olub.
Nəticə şəhərin siyasi mənzərəsində ciddi dəyişiklik kimi qiymətləndirilir və kansler Fridrix Merzin hakim koalisiyası üçün geriləmə hesab olunur. Bu nəticə Sol Partiyanın namizədi Elif Eralpın Berlinin həmin partiyadan olan ilk meri seçilməsi ehtimalını artırıb. Sol Partiya keçmiş Şərqi Almaniyanın kommunist partiyasından formalaşıb.
Sol Partiyanın əsas seçki vədi mənzil məsələsi olub
Elif Eralp seçki kampaniyasında Berlində sürətlə artan mənzil və kirayə xərclərinə xüsusi diqqət yetirib. O, kirayə bazarındakı vəziyyəti paytaxtın ən böyük sosial problemi adlandırıb və özəl mənzil şirkətlərinin milliləşdirilməsinə çalışacağını bildirib.
Bu təklif 2021-ci ildə keçirilmiş referendumdan sonra gündəmə gəlib. Həmin referendumda seçicilərin 58 faizi iri özəl mənzil şirkətlərinin ictimai mülkiyyətə keçirilməsi üçün qanun hazırlanmasını dəstəkləyib. Söhbət təxminən 220 min mənzil vahidindən gedə bilər, lakin bu planın həyata keçirilib-keçirilməyəcəyi hələ məlum deyil.
SPD-nin baş katibi Tim Klyusendorf mənzil şirkətlərinin milliləşdirilməsinin təxminən 20 milyard avroya başa gələ biləcəyini deyib.
