OMM Redaksiyası
İfrat sağçı Almaniya üçün Alternativ (AfD) partiyası bazar günü ölkənin şimal-şərqində yerləşən Meklenburq-Ön Pomeraniya əyalətində keçirilən seçkidə birinci olub.
ARD telekanalının yayımladığı ilkin nəticələrə əsasən, AfD 38,3 faiz səs toplayıb. Mərkəz-sol Sosial Demokratlar Partiyası (SPD) 35,4 faizlə ikinci yerdə qərarlaşıb.
Kansler Fridrix Mertsin rəhbərlik etdiyi mühafizəkarlar isə 4,9 faiz səs əldə edib. Bu göstərici əyalət parlamentinə düşmək üçün tələb olunan 5 faizlik baryerdən aşağıdır və partiyanın parlamentdən kənarda qalması mümkündür.
Merz nəticəni “fəlakət” adlandırıb
Exit-poll nəticələri açıqlanandan sonra Merts seçkinin nəticəsini “fəlakət” adlandırıb. Bununla belə, kansler vəzifəsini davam etdirəcəyini və islahat gündəliyini həyata keçirməyə çalışacağını bildirib.
Seçkidən əvvəl zəif nəticənin Mertsi istefaya məcbur edə biləcəyi ilə bağlı ehtimallar səsləndirilirdi. AfD-nin bu qələbəsi partiyanın cari ay ərzində əyalət səviyyəsində ikinci dəfə birinci olması deməkdir.
Berlin seçkisində solçular öndədir
Bazar günü Almaniyanın paytaxtı Berlində də seçki keçirilib. İlkin nəticələrə görə, “Die Linke” partiyası 25,3 faiz səs toplayaraq birinci olub. Hazırda Sosial Demokratlarla koalisiya hökumətində olan Mertsin mühafizəkarları isə 19 faiz səs qazanıb.
AfD Berlində də mövqelərini gücləndirərək 16,3 faiz səs əldə edib. Bu, “Die Linke” partiyasının Berlində ilk dəfə seçkidə birinci olmasıdır. Partiya korporativ ev sahiblərinə məxsus mənzillərin milliləşdirilməsini və kirayə haqlarının məhdudlaşdırılmasını təklif edir.
Seçiciləri yaşayış xərcləri narahat edir
Ötən il Almaniya iqtisadiyyatını yenidən böyümə trayektoriyasına qaytarmaq vədi ilə hakimiyyətə gələn Merts seçicilərin dəstəyini qazanmaqda çətinlik çəkir. Kommunikasiya səhvləri, eləcə də pensiya, vergi və səhiyyə sahələrində populyar olmayan islahatlar hökumətə narazılığı artırıb.
Meklenburq-Ön Pomeraniya və Berlin seçkilərində kampaniyanın əsas mövzuları enerji və mənzil xərclərinin bahalaşması olub. Merts cümə günü qaz və dizel yanacağına vergi güzəştlərini də nəzərdə tutan istehlakçı dəstəyi paketi təqdim edib.
Meklenburq-Ön Pomeraniyada səs verən bəzi seçicilər yaşayış xərclərinin əsas narahatlıq mənbəyi olduğunu deyiblər. Şverində yaşayan seçici Karlotta Hayk “Reuters” agentliyinə bildirib ki, mövcud maaşlarla şəhərdə bir çox şeyi ödəmək çətindir.
