16 yaşadək qızlardan ibarət Azərbaycan voleybol millisi Avropa çempionatının birinci təsnifat mərhələsində ilk qələbəsini qazanıb. Estoniyanın Kyariku şəhərində keçirilən yarışın B qrupunda mübarizə aparan komanda sonuncu, üçüncü turda Litva ilə qarşılaşıb.
Görüş Azərbaycan millisinin 3:1 hesablı qələbəsi ilə yekunlaşıb. Setlər 25:16, 23:25, 25:23 və 27:25 hesabları ilə başa çatıb.
Azərbaycan komandası ilk setdə 25:16 hesabı ilə qalib gəlib. Litva ikinci hissədə tarazlığı bərpa etsə də, yığmamız sonrakı iki setdə üstün olub və matçı qələbə ilə başa vurub.
Millimiz turnirin ilk oyununda Estoniyaya 2:3, ikinci qarşılaşmada isə Ukraynaya 1:3 hesabı ilə uduzub. Qrup mərhələsinin yekununda Litva altı xalla birinci yeri tutub. Ukrayna, Estoniya və Azərbaycan yığmalarının hər biri dörd xal toplayıb.