Murad Məmmədovun çıxış etdiyi “Pafos” Kipr çempionatının 10-cu turunda səfərdə “Omoniya Aradippu”nu 2:1 hesabı ilə məğlub edib.
Qonaqlar 17-ci dəqiqədə Ken Semanın, 27-ci dəqiqədə isə Jonatas Noronun qolları ilə hesabda önə keçiblər. İki dəqiqə sonra “Pafos”un futbolçusu Anderson Silva avtoqol vurub və meydan sahibləri fərqi azaldıblar.
Fasilədən sonra qonaqlar azlıqda qalıblar. İlk hissədən sonra meydana daxil olan Dominqos Kina 47-ci dəqiqədə qırmızı vərəqə alıb.
59-cu dəqiqədə “Omoniya Aradippu”nun futbolçusu Yorqos Pontikos qol vursa da, VAR yoxlamasından sonra qol qeydə alınmayıb. “Pafos” qalan vaxtda üstünlüyünü qoruyub.
Murad Məmmədov matçın iştirak ərizəsində yer alsa da, ehtiyat oyunçular skamyasından meydana çıxmayıb. Qələbədən sonra “Pafos”un xalı 19-a çatıb.
Kontekst
Noyabrın 9-da keçirilən doqquzuncu tur matçında “Pafos” “Omoniya 29 May”ı 4:2 hesabı ilə məğlub edib. Həmin nəticədən sonra komandanın hesabında 16 xal var idi.