Qılıncoynatmanın sablya növü üzrə qadınlardan ibarət Azərbaycan millisi Misirin paytaxtı Qahirədə keçirilən Dünya Kubokunun mərhələ yarışını 14-cü yerdə başa vurub. Yarışda 22 komanda iştirak edib. Bu barədə Azərbaycan Qılıncoynatma Federasiyası məlumat yayıb.
Komanda yarışı
Zərifə Hüseynova, Səbinə Kərimova, Anna Başta və Palina Kaspiaroviçdən ibarət yığma ilk görüşdə Türkiyə seçməsini 45:30 hesabı ilə məğlub edib. Ən güclü səkkizliyə yüksəlmək uğrunda qarşılaşmada ABŞ qılıncoynadanlarına 36:45 hesabı ilə uduzub.
9-16-cı yerlər uğrunda matçlarda Çin kollektivinə 34:45 hesabı ilə məğlub olan Azərbaycan komandası İspaniya millisini 45:29 hesabı ilə üstələyib. Yığma son görüşündə Ukrayna təmsilçilərinə 36:45 hesabı ilə yenilib.
Fərdi yarış
Azərbaycan təmsilçiləri arasında ən yaxşı nəticəni Anna Başta göstərib. O, 180 idmançı arasında 16-cı yeri tutub. Qrup mərhələsini 4 qələbə ilə başa vuran Başta pley-offda Polşa və ABŞ sablyaçılarına qalib gələrək ən güclü 64-lüyə yüksəlib. Daha sonra Macarıstan və Çin idmançılarını mübarizədən kənarlaşdırıb. Ən güclü səkkizliyə vəsiqə uğrunda görüşdə Rusiya təmsilçisi Yana Yeqoryana 11:15 hesabı ilə uduzub.
Palina Kaspiaroviç ən güclü 32-liyə, Səbinə Kərimova isə 64-lüyə qədər irəliləyib. Zərifə Hüseynova mübarizəni pley-offda dayandırıb.
Qeyd edək ki, Yeniyetmələrin dördüncü Yay Olimpiya Oyunlarında sablya üzrə Azərbaycanı təmsil edən Abbas Hüseynov fərdi yarışda altıncı olub.