Azərbaycanın akrobatika gimnastikası üzrə dünya çempionları vətənə qayıdıblar

İtaliyanın Pezaro şəhərində keçirilən akrobatika gimnastikası üzrə dünya çempionatının medalçıları Azərbaycana qayıdıblar.

Gimnastlar Heydər Əliyev adına Beynəlxalq Hava Limanında Azərbaycan Gimnastika Federasiyasının nümayəndələri, yaxınları və media təmsilçiləri tərəfindən qarşılanıblar.

Qadın qrupu tarix yazıb

Böyüklər yaş kateqoriyasında çıxış edən Anahita Bashiri, Zəhra Rəşidova və Nəzrin Zeyniyeva balans hərəkətləri proqramında qızıl medal qazanıblar. Bu, Azərbaycan akrobatika gimnastikası tarixində qadın qrupları arasında dünya çempionatında əldə olunan ilk qızıl medal olub.

Təsnifat mərhələsində 28.330 xal toplayaraq birinci olan Azərbaycan qrupu finalda nəticəsini 28.580 xala çatdırıb və bütün rəqiblərini geridə qoyub.

Kişi cütlüyü bürünc medal qazanıb

Murad Rəfiyev və Daniel Abbasov da balans hərəkətləri proqramında fəxri kürsüyə yüksəliblər. Təsnifat mərhələsini 28.550 xalla üçüncü pillədə başa vuran cütlük finalda 28.950 xal toplayaraq bürünc medal əldə edib.