Avropa yanacaq çatışmazlığı ilə üzləşəcək?

Hollandiyanın "Rabobank" bankının araşdırmasına görə, Hörmüz boğazı uzun müddət bağlı qalsa, Avropa reaktiv yanacaq, nafta və yanacaq mazutunun çatışmazlığı ilə üzləşə bilər.

"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.

Bildirilib ki, ilin sonuna qədər daşımalarda fasilələr davam edərsə, Aİ-nin bu yanacaq ehtiyatları əhəmiyyətli dərəcədə tükənəcək və neft məhsullarının qiymətləri artmağa davam edəcək.

Bu ssenaridə ən ciddi nəticələr aviasiya, logistika, turizm və kənd təsərrüfatı üçün gözlənilir.

Analitiklərin hesablamalarına görə, Hörmüz boğazında fasilələr başlayandan bəri qlobal neft tədarükü artıq gündə 10,3 milyon barel, neft məhsulları tədarükü isə 4,5 milyon barel azalıb. Bu, qlobal neft tələbatının təxminən 14%-nə bərabərdir.

Bank həmçinin qeyd edib ki, bəzi Asiya ölkələri artıq kerosin çatışmazlığı səbəbindən yanacaq tədarükündə fasilələr və uçuşların ləğvi ilə üzləşirlər.