OMM Redaksiyası
"Aston Villa" klubunun rəhbərliyi 23 yaşlı yarımmüdafiəçi Morqan Rocersin transferi ilə bağlı qəti mövqe nümayiş etdirib.
"Operativ Məlumat Mərkəzi-OMM" "Telegraph" nəşrinə istinadən xəbər verir ki, klub rəhbərliyi futbolçuya olan ciddi marağı nəzərə alsa da, onu satmaq niyyətində deyil.
Komandanın Çempionlar Liqasına vəsiqə qazanması klubun transfer siyasətinə də təsir edib. "Villanlar" heyətlərindəki əsas ulduzlardan biri hesab olunan Rocerslə yollarını ayırmağa ehtiyac duymurlar. Bununla belə, klubun rəsmi mövqeyinin çox yüksək təklif gələcəyi təqdirdə dəyişib-dəyişməyəcəyi hələlik sual altındadır.
Gənc futbolçuya maraq göstərən klubların siyahısı kifayət qədər nüfuzludur. Xüsusilə, Londonun "Arsenal" klubu oyunçunun əsas iddiaçısı kimi göstərilir. Eyni zamanda, "Mançester Siti"nin də Rocersin xidmətində maraqlı olduğu barədə iddialar səslənir. "Transfermarkt" portalı İngiltərə millisinin üzvünün bazar dəyərini 80 milyon avro olaraq qiymətləndirir.
