OMM Redaksiyası
Avropa İttifaqı (Aİ) Ukraynanın üzvlük prosesi çərçivəsində daha iki istiqamət üzrə danışıqlara başlayıb. Oktyabrın 13-də açılan klasterlər Daxili Bazar, eləcə də Rəqabətqabiliyyətlilik və İnklüziv Artım sahələrini əhatə edir.
Bu sahələrə malların, xidmətlərin, işçilərin və kapitalın sərbəst hərəkəti ilə yanaşı, rəqabət siyasəti, vergitutma, təhsil, məşğulluq, rəqəmsal transformasiya və iqtisadi idarəetmə daxildir.
Yeni mərhələ iyulda Aİ-nin xarici əlaqələr klasteri üzrə danışıqların başlanmasından sonra gəlib. İrlandiyanın Avropa məsələləri və müdafiə üzrə dövlət naziri Tomas Börn klasterlərin açılmasını Ukraynanın üzvlük prosesində mühüm hadisə kimi qiymətləndirib.
“Bu gün Ukraynanın Aİ-yə üzvlük yolunda daha bir mərhələni keçdik”, – Börn deyib.
Hazırda Aİ Şurasına rotasiya qaydasında sədrlik edən İrlandiyanın Ukraynanın üzvlük təşəbbüsünü irəli aparmağa sadiq qaldığını bildirən nazir danışıqların davam etdirilməsinin vacibliyini vurğulayıb.
Aİ, həmçinin, müvafiq danışıqlar fəsillərinin müvəqqəti bağlanmasından əvvəl Ukraynanın yerinə yetirməli olduğu meyarları müəyyənləşdirib. Kiyevin qanunvericiliyini, qaydalarını və institutlarını Aİ normalarına uyğunlaşdırması üzrə irəliləyiş danışıqlar boyunca qiymətləndiriləcək.
Namizəd ölkələrin Aİ-yə üzvlüyü üçün geniş siyasi, hüquqi və iqtisadi meyarlara cavab verməsi, həmçinin üzvlüyün bütün ittifaq ölkələri tərəfindən təsdiqlənməsi tələb olunur.
Ukrayna Prezidenti Volodimir Zelenski qərarı ölkəsinin Avropa ilə inteqrasiyasında daha bir irəliləyiş kimi qarşılayıb. O, “X” sosial şəbəkəsində paylaşımında Aİ liderlərinə və üzv dövlətlərə dəstəyə görə təşəkkür edib, ilin sonunadək qalan iki klaster üzrə danışıqların açılmasına çağırıb.
“Ukraynanın və Avropanın təhlükəsizliyi naminə çalışan hər kəsə dərindən minnətdaram. Birlikdə daha güclü Avropayıq”, – Zelenski yazıb.
Ukrayna prezidenti bildirib ki, bütün altı danışıqlar klasterinin açılması üçün mövcud irəliləyişdən istifadə etmək vacibdir.
