OMM Redaksiyası
Rusiya Federal Təhlükəsizlik Xidməti (FSB) Yaponiyanın “Hokkaido Shimbun” qəzetində çalışan jurnalisti casusluq şübhəsi ilə saxlayıb. Hadisə jurnalistin ölkəni tərk etməsindən əvvəl Rusiyanın Uzaq Şərqində yerləşən Saxalin vilayətində baş verib.
FSB iddia edib ki, jurnalist Rusiyanın müdafiə imkanları ilə bağlı məlumatları toplayıb və saxlayıb, onları xarici kəşfiyyat xidmətlərinə ötürməyi planlaşdırıb. Qurum onun fəaliyyətinin qarşısının alındığını bildirib. İddialar müstəqil şəkildə təsdiqlənməyib.
Rusiya Xarici İşlər Nazirliyinin sözçüsü Mariya Zaxarova jurnalistin adını rus dilindəki yazılışına əsasən İmai Yuki kimi açıqlayıb. Onun sözlərinə görə, saxlanılma Rusiya ilə Yaponiya arasındakı münasibətləri daha da gərginləşdirəcək.
Yaponiyanın xarici işlər naziri Tosimitsu Motegi çərşənbə günü bildirib ki, ölkəsinin Moskvadakı səfirliyi və Yujno-Saxalinskdəki baş konsulluğu Rusiya rəsmilərindən məlumat istəyib. Yaponiya saxlanılan vətəndaşına ədalətli yanaşılmasına və humanitar mülahizələrin nəzərə alınmasına çağırıb.
“Hokkaido Shimbun” qəzetinin nümayəndəsi məlumatları dəqiqləşdirdiklərini deyib və jurnalistin təhlükəsizliyinin əsas prioritet olduğunu bildirib.
Rusiya dövlət televiziyasının yayımladığı görüntülərdə qara geyimli, üzü maskalı üç nəfərin yerdə olan bir şəxsi qandalladığı göstərilib. Süjetdə həmin şəxsin casusluqda şübhəli bilindiyi bildirilib. Sonrakı kadrlarda onun FSB əməkdaşlarının müşayiəti ilə təyyarəyə aparıldığı və Moskva məhkəməsində qəfəsdə olduğu görünür. Məhkəmə jurnalistin təxminən iki ay müddətinə həbsdə saxlanılmasına qərar verib.
Moskva ilə Tokio arasında münasibətlər gərgin olaraq qalır
Jurnalistin saxlanılması Rusiya 2022-ci ildə Ukraynaya qarşı genişmiqyaslı müharibəyə başladıqdan sonra Moskva ilə Tokio arasında münasibətlərin pisləşdiyi dövrə təsadüf edir. Yaponiya Rusiyaya qarşı Qərb sanksiyalarına qoşulduğuna görə Moskva onu “dost olmayan” ölkə hesab edir. Tokio sanksiyaları qüvvədə saxlayır və Ukraynaya dəstəyini davam etdirir.
İki ölkə arasında Kuril adaları ilə bağlı uzunmüddətli ərazi mübahisəsi də mövcuddur. Yaponiyada Şimal əraziləri adlandırılan adalardan birinə Rusiya Prezidenti Vladimir Putinin avqustda səfəri Yaponiyada tənqidlərə səbəb olub. Çinin Heylunszyan vilayətindən olan nümayəndə heyəti də çərşənbə axşamı adaya səfər edib.
Yaponiya Nazirlər Kabineti bu ay Rusiyaya qarşı əlavə sanksiyaları təsdiqləyib. Tədbirlərə ixrac məhdudiyyətlərinin genişləndirilməsi və Rusiya hərbçiləri ilə əlaqəli şəxslərin aktivlərinin dondurulması daxildir.
Yaponiyanın baş kabinet katibi Minoru Kihara münasibətlərin çətin olmasına baxmayaraq, Rusiya ilə ünsiyyətin zəruri olduğunu bildirib.
Rusiyada xarici jurnalistlərlə bağlı ən diqqətçəkən işlərdən biri “Wall Street Journal” qəzetinin müxbiri Evan Qerşkoviçin 2023-cü ildə saxlanılması olub. Rusiya məhkəməsi onu casusluqda təqsirli bilərək 16 il müddətinə azadlıqdan məhrum edib. Qerşkoviç 2024-cü ilin avqustunda Rusiya ilə Qərb arasında məhbus mübadiləsi çərçivəsində azadlığa buraxılıb.
