Afət Ziyadqızı
ABŞ və İran arasında hərbi qarşıdurma 11-ci gündür davam edir.
“Operativ Məlumat Mərkəzi-OMM” xəbər verir ki, Pentaqonun məlumatına görə, münaqişənin ABŞ-a vurduğu iqtisadi zərər 37,5 milyard dollara çatıb.
Bildirilib ki, ABŞ Prezidenti Donald Tramp İranın nüvə obyektlərinə, xüsusilə "Pickaxe Mountain" mərkəzinə qarşı ağır zərbələrin endirilə biləcəyini açıqlayıb. Tehran isə hər hansı hücumun regionda daha genişmiqyaslı toqquşmalara səbəb olacağı barədə xəbərdarlıq edib.
Qeyd olunur ki, Yaxın Şərqdə nəqliyyat və enerji təhlükəsizliyi ilə bağlı vəziyyət gərgin olaraq qalır. İran İnqilab Keşikçiləri Korpusu Hörmüz boğazı yaxınlığında neft tankerlərinin hədəf alındığını və boğazın gəmiçilik üçün "tamamilə bağlandığını" iddia edib. Bu xəbərlər fonunda "Brent" markalı neftin qiyməti 93 dolları keçərək son altı həftənin ən yüksək göstəricisinə yüksəlib.
Məlumata görə, Yəməndəki husilər Səudiyyə Ərəbistanına məxsus iki neft tankerini hədəf aldıqlarını açıqlayıblar. Küveytin hava hücumundan müdafiə sistemləri isə ölkə ərazisinə istiqamətlənən İran dronlarını zərərsizləşdirib.
Bundan əlavə, Hollandiyanın "KLM" aviaşirkəti Yaxın Şərqdəki təhlükəsizlik vəziyyətinə görə Dubay, Ər-Riyad və Dəmmama uçuşların dayandırılma müddətini sentyabrın 6-dək uzadıb.
Diplomatik səylərin davam etdiyi də bildirilir. ABŞ Dövlət katibi Marko Rubio Vaşinqtonun İranla diplomatik həll yoluna açıq olduğunu, lakin Tehranın terrora dəstəyini və nüvə proqramı ilə bağlı iddialarını dayandırmalı olduğunu qeyd edib.
Eyni zamanda, İordaniyadakı ABŞ hərbi bazalarına edilən hücumlar nəticəsində amerikalı hərbçilərin həlak olması Vaşinqtonun mövqeyini sərtləşdirib. Donald Tramp həlak olan hərbçilərin xatirəsinə keçiriləcək mərasimdə iştirak edəcəyini və İranın bu hücumlara görə "ağır bədəl ödəyəcəyini" bildirib.
