ABŞ Meksikaya qarşı sərhəd və narkotik tələblərini açıqladı

ABŞ Dövlət Departamentinin yaydığı məlumata görə, Vaşinqtonda ABŞ dövlət katibi Marko Rubio ilə Meksikanın xarici işlər naziri Roberto Velasko Alvares arasında görüş keçirilib.

“Operativ Məlumat Mərkəzi – OMM” xəbər verir ki, görüş zamanı iki ölkə arasında strateji əhəmiyyət daşıyan təhlükəsizlik məsələləri müzakirə olunub.

Danışıqlar zamanı ABŞ tərəfi Meksikadan bir sıra istiqamətlərdə qətiyyətli addımlar atılmasını tələb edib.

Xüsusilə qanunsuz miqrasiyanın qarşısının alınması və ABŞ-Meksika sərhədindən qeyri-qanuni keçidlərin dayandırılması məsələsi diqqət mərkəzində olub.

Tərəflər, həmçinin fentanil və digər qanunsuz narkotik maddələrin ABŞ ərazisinə keçirilməsinin qarşısının alınması istiqamətində əməkdaşlığı müzakirə ediblər.

ABŞ tərəfi narkokartellərə və beynəlxalq terror təşkilatlarına qarşı mübarizənin gücləndirilməsinin, onların fəaliyyət imkanlarının məhdudlaşdırılmasının və tərksilah edilməsinin vacibliyini vurğulayıb.

ABŞ rəsmilərinin sözlərinə görə, bu tədbirlər regionda sabitliyin və təhlükəsizliyin təmin olunması baxımından mühüm əhəmiyyət daşıyır.