OMM Redaksiyası
ABŞ dövlət katibi Marko Rubio İranın xarici işlər naziri Abbas Əraqçinin rəhbərlik etdiyi nümayəndə heyətindən Birləşmiş Ştatları tərk etməyi tələb edib.
ABŞ rəsmilərinin “Anadolu” agentliyi və “Axios”a verdiyi məlumata görə, Birləşmiş Ştatların BMT-dəki missiyası bazar ertəsi axşamı İranın BMT-dəki nümayəndəliyinə Abbas Əraqçi və nümayəndə heyətinin Nyu-Yorku “dərhal” tərk etməli olduğunu bildirib.
Nümayəndə heyəti Dohaya yollanıb
“Axios”un yazdığına görə, ABŞ rəsmisi İran nümayəndə heyətinin “burada qalmaq üçün verilən müddəti aşdığını” deyib. Onun sözlərinə görə, BMT Baş Assambleyasının iclasları başa çatdığından iranlı rəsmilərin Nyu-Yorkda qalması üçün səbəb olmayıb.
Məlumata əsasən, nümayəndə heyəti çərşənbə axşamı yerli vaxtla saat 01:20 radələrində Nyu-Yorkdan Dohaya yola düşüb. Digər mənbə isə Abbas Əraqçinin həmin axşam Tehrana qayıtmasının əvvəlcədən planlaşdırıldığını bildirib.
Danışıqlarda irəliləyiş əldə olunmayıb
Nümayəndə heyətinin ölkədən çıxması Vaşinqtonla Tehran arasında münaqişənin dayandırılması üzrə diplomatik səylərin zəiflədiyi vaxt baş verib.
“Axios”un məlumatına görə, Ağ Ev bazar ertəsi səhər keçirilən danışıqlarda irəliləyiş əldə olunacağına ümid edib. Lakin günortadan sonra müzakirələrin dalana dirəndiyi aydınlaşıb.
Qətərli vasitəçilər mümkün kompromis təklifi ilə bağlı həm Vaşinqton, həm də Tehranla müzakirələri davam etdiriblər.
Hörmüz boğazının açılması gündəmdədir
Diplomatik uğursuzluq fevralın 28-də ABŞ və İsrailin İrana qarşı hərbi əməliyyata başlamasından sonra yaranan daha geniş münaqişə fonunda baş verib. Tehran isə region üzrə raket və pilotsuz uçuş aparatları ilə cavab zərbələri endirib və qlobal enerji daşımaları üçün mühüm marşrut olan Hörmüz boğazını faktiki olaraq bağlayıb.
Diplomatik səylər iyundan etibarən davam edir. Həmin vaxt ABŞ və İran Hörmüz boğazında naviqasiya azadlığının bərpasına və İranın nüvə proqramı ilə bağlı narahatlıqların aradan qaldırılmasına yönəlmiş təcili tədbirləri nəzərdə tutan memorandum imzalayıb.
Son danışıqlarda əsas diqqət yalnız hərbi əməliyyatların dayandırılmasına deyil, həm də dünyanın strateji baxımdan ən mühüm su yollarından biri ilə yük daşımalarının təhlükəsizliyinin təmin edilməsinə yönəlib. Müzakirələrin dayanmasından sonra Vaşinqtonla Tehran arasında kompromis tapılması üçün Qətərin vasitəçilik səyləri əsas diplomatik kanal olaraq qalır.
