Afət Ziyadqızı
Braziliyanın Rio-de-Janeyro şəhərində keçirilən "AIDS 2026" konfransında ABŞ Dövlət Departamentinin təqdim etdiyi Afrika xəritəsi ciddi tənqidlərə səbəb olub.
“Operativ Məlumat Mərkəzi-OMM” xəbər verir ki, ABŞ-nin QİÇS-lə Mübarizə üzrə Fövqəladə Planının (PEPFAR) rəhbəri Jeff Grahamın təqdim etdiyi slaydlarda Afrika qitəsinin coğrafiyası ciddi şəkildə təhrif olunub. Xəritədə Nigeriya dənizə çıxışı olmayan ölkə kimi göstərilib, Mozambik Afrika Buynuzunda, Fildişi Sahili isə qitənin şərq hissəsində yerləşdirilib. Xəritənin görüntüləri ilk olaraq QİÇS üzrə mütəxəssis Emily Bass tərəfindən ictimailəşdirilib.
Məlumata görə, təqdim olunan xəritədə OpenAI alətlərindən istifadə edildiyini göstərən filiqran (su nişanı) da yer alıb. OpenAI məsələ ilə bağlı araşdırma apardığını bildirib.
ABŞ Dövlət Departamenti isə hadisəyə görə məsuliyyəti öz üzərinə götürərək açıqlayıb ki, yanlışlıq konfransdan əvvəl təqdimat slaydlarının tələsik redaktə edilməsi zamanı baş verib. Qurum, buna baxmayaraq, konfrans çərçivəsində keçirilən müzakirələrin konstruktiv keçdiyini və Afrika ölkələri ilə səhiyyə sahəsində əməkdaşlığın davam etdiriləcəyini vurğulayıb.
