Afət Ziyadqızı
Birləşmiş Ştatların Kolumbiya Dairə Məhkəməsinin federal hakimi Tim Kelli (Timothy Kelly) Ağ Ev Administrasiyasının CNN, “MS NOW” və “Politico” media qurumlarının jurnalistlərinin Prezident rezidensiyasına girişini məhdudlaşdıran qərarı ilə bağlı məhkəmə çəkişməsi yekunlaşanadək sözügedən mətbuat nümayəndələrinin binaya daxil olmasına icazə verilməsi barədə sərəncam çıxarıb.
"Operativ Məlumat Mərkəzi-OMM" xəbər verir ki, hakim T.Kelli qərarında Prezident Donald Trampın tətbiq etdiyi qadağanın ABŞ Konstitusiyasına ifadə və mətbuat azadlığını zəmanət altına alan Birinci Düzəlişin pozulması riski yaratdığını vurğulayıb.
Məhkəmə sənədində dövlət başçısının qadağanı elan edərkən işlətdiyi bəyanatların jurnalistlərin konstitusiya hüquqları ilə onların akkreditasiya kartlarının ləğvi arasında birbaşa əlaqə olduğunu nümayiş etdirdiyi qeyd olunub. Hakim bu addımı mətbuatın tənqidi fəaliyyətinə qarşı siyasi cavab tədbiri kimi dəyərləndirib.
Məhkəmə ABŞ Ədliyyə Nazirliyinin qadağanın güman edilən milli təhlükəsizlik amilləri ilə bağlı olması barədə müdafiə mövqeyini əsassız hesab edərək rədd edib. Qərarda Administrasiyanın sözügedən addımı əvvəlcədən təhlükəsizlik mülahizələri ilə əsaslandırdığına dair iş materiallarında heç bir mötəbər sübutun olmadığı bildirilib.
Trampın birinci prezidentlik dövründə təyin olunmuş hakim Kelli ləğv edilən mətbuat vəsiqələrinin bərpa olunmasının vacibliyini diqqətə çatdırıb.
D.Tramp sentyabrın 18-də elan etdiyi məhdudiyyəti müdafiə edərək, adıçəkilən media qurumlarının materiallarını “qərəzli” və “birtərəfli” hesab etdiyini bildirib. Ədliyyə Nazirliyi isə məhkəməyə təqdim etdiyi sənədlərdə İran ətrafında gedən proseslər və digər strateji mövzular üzrə dərc olunan xəbərləri göstərərək qadağanı dövlət maraqları ilə əlaqələndirməyə çalışıb.
Dinləmələrdə hakim Kelli hökumət vəkillərinin ilk qərardakı səbəblərlə məhkəməyə təqdim olunan arqumentlər arasında ziddiyyət yaratmasını qeyri-adi hal adlandırıb. Ədliyyə Nazirliyinin vəkili Maykl Velçik (Michael Velchik) akkreditasiya hüququnun birbaşa Prezidentin səlahiyyətində olduğunu iddia etsə də, media qurumlarının vəkili Ted Butros (Ted Boutrous) qərarın tamamilə subyektiv və özbaşına verildiyini müdafiə edib.
Hakim Kellinin qərarı Ağ Evin məhdudiyyətlərini müvəqqəti dayandıran əvvəlki qəti xəbərdarlığın müddəti başa çatdıqdan sonra verilib. Bu qərar Tramp Administrasiyasına yuxarı instansiya məhkəməsinə apellyasiya şikayəti vermək hüququ tanıyır.
