Afət Ziyadqızı
ABŞ-nin aparıcı media nəhəngləri – “CNN”, “MS NOW” və “Politico” təşkilatlarının hüquqşünasları Prezident Donald Tramp administrasiyasının jurnalistlərə qarşı tətbiq etdiyi məhdudiyyətlərlə bağlı məhkəməyə iddia ərizəsi təqdim ediblər. Vəkillər Ağ Evin jurnalistlərin akreditasiyasını ləğv etmək üçün irəli sürdüyü “milli təhlükəsizlik” və “peşəkarlıq prinsipləri” bəhanələrinin heç bir konkret sübuta söykənmədiyini, bu addımın mətbuat azadlığını pozan siyasi qisas xarakteri daşıdığını bəyan ediblər.
"Operativ Məlumat Mərkəzi-OMM" xəbər verir ki, məhkəməyə təqdim olunan sənədlərdə Donald Trampın “Time” jurnalına müsahibəsində “daim mənfi xəbərlərə dözmək məcburiyyətində olmadığını” bildirməsi qadağaların əsl motivini ortaya qoyan etiraf kimi qiymətləndirilib.
Məhkəmə çəkişməsi davam etdiyi müddətdə “CNN” və “Politico” müxbirlərinin Prezidentin “Air Force One” təyyarəsindəki mətbuat brifinqlərinə buraxılmadığı diqqətə çatdırılıb.
İş üzrə əvvəlki dinləmədə federal hakim Timoti Kelli (Timothy Kelly) media qurumlarının xeyrinə müvəqqəti qərar çıxararaq, administrasiyanın yarıməsr hissli hüquqi presedentləri tapdalaya bilməyəcəyini və Ağ Evin “milli təhlükəsizlik təhdidi” iddiasının əsassız olduğunu vurğulayıb. Birləşmiş Ştatların 77 aparıcı media qurumu və müxtəlif mətbuat koalisiyaları yazılı müraciət edərək iddiaçı media təşkilatlarına tam dəstəklərini ifadə ediblər.
Cümə axşamı keçiriləcək növbəti dinləmədə qərarın administrasiyanın əleyhinə olacağı təqdirdə, Ağ Evin məsələni dərhal Apellyasiya Məhkəməsinə daşıyacağı gözlənilir. ABŞ media ictimaiyyəti bu kimi addımların gələcəkdə sistemli senzura mexanizminə çevrilə biləcəyindən ciddi narahatlığını bildirir.
