ABŞ-nin Vaşinqton ştatında, xüsusilə Spokan şəhəri ətrafında davam edən genişmiqyaslı meşə yanğınları ciddi fəsadlara səbəb olub.
“Operativ Məlumat Mərkəzi-OMM” xəbər verir ki, bu barədə yerli rəsmilər məlumat yayıb.
Məlumata görə, üç gündür davam edən yanğınlar nəticəsində azı 700 tikili tamamilə yararsız hala düşüb. Hadisə hazırda ABŞ üzrə ən yüksək prioritetli yanğın hadisələrindən biri kimi qiymətləndirilir.
Bildirilib ki, Spokan yaxınlığında başlayan yanğın qısa müddətdə 3200 hektardan çox ərazini əhatə edib. Təhlükəsizlik tədbirləri çərçivəsində təxliyə olunan insanların sayının 64 min nəfərə çatdığı açıqlanıb. Bir gün əvvəl bu rəqəm 4 min nəfər təşkil edib.
Qeyd olunub ki, bəzi sakinlər evlərini son anda tərk etmək məcburiyyətində qalıb. Yerli sakin Kami Fehliq yanğının sürətlə yayıldığını və evinə qayıtdıqda yalnız külə dönmüş qalıqlarla qarşılaşdığını bildirib.
Hazırda bölgədə 1100-dən çox yanğınsöndürən alovla mübarizə aparır. Rəsmilər indiyədək insan tələfatı və yaralanma hallarının qeydə alınmadığını açıqlasa da, yanğınsöndürmə işləri davam etdikcə vəziyyətin dəyişə biləcəyi barədə xəbərdarlıq edilib.
Məlumata əsasən, Vaşinqton ştatında hazırda 15-dən çox böyük yanğın ocağı mövcuddur və 250 min akrdan çox ərazi alovun təsiri altındadır.
Dövlət Torpaqları Komissarı Deyv Upthegrove bu mövsümün Sakit Okeanın şimal-qərb bölgəsi üçün son illərin ən ağır yanğın dövrlərindən biri olduğunu bildirib. Yanğınların yaranma səbəbləri ilə bağlı araşdırmalar davam edir.
