OMM Redaksiyası
Bakı-Tbilisi-Bakı marşrutu üzrə hərəkət edən qatarlarda baqajın daşınması ilə bağlı yeni qaydalar müəyyən edilib. “Azərbaycan Dəmir Yolları” QSC-dən (ADY) verilən məlumata görə, sərnişinlər müəyyən edilmiş çəki limitləri daxilində baqajlarını ödənişsiz daşıya bilərlər.
Qaydalara əsasən, daşınma şərtləri aşağıdakı kimidir:
- Komfort və Komfort+ sinifləri üzrə çəkisi 23 kq-dan çox olmayan 1 ədəd baqaj pulsuzdur.
- Lüks sinifdə isə 30 kq-a qədər olan 1 ədəd baqaj üçün ödəniş tələb olunmur.
Qurumdan bildirilib ki, sərnişinlər kiçik ölçülü əl yüklərini də pulsuz daşımaq hüququna malikdirlər. Həmçinin, qatlanan uşaq arabalarının daşınması üçün də əlavə ödəniş nəzərdə tutulmayıb. Komfort+ kupesini tam şəkildə bron edən sərnişinlər isə uşaq arabalarını açıq vəziyyətdə daşımaq imkanına sahibdirlər.
