Fərhad Abdullayev

Fərhad Abdullayev 5 dekabr 1958-ci ildə Bakı şəhərində anadan olub. 1965–1975-ci illərdə Bakının 189 saylı orta məktəbində oxuyub.

1980-ci ildə təyinatla Azərbaycan Respublikası Ali Məhkəməsində işə başlayıb: əvvəlcə məsləhətçi, sonra baş məsləhətçi, 1985-ci ildən isə şöbə rəisi vəzifəsində çalışıb. 1990-cı ildə Ali Sovet tərəfindən Ali Məhkəmənin hakimi seçilib və 2000-ci ilədək bu vəzifədə işləyib. 2000-ci ilin sentyabrında ölkədə ilk dəfə yaradılan Apellyasiya Məhkəməsinin sədr müavini təyin olunub.

25 iyun 2003-cü ildə Milli Məclisin təsdiqindən sonra Prezidentin fərmanı ilə Konstitusiya Məhkəməsinin sədri təyin edilib; 24 iyun 2013-cü ildə eyni qaydada bu vəzifəyə yenidən təyin olunub. Bir sıra qanunvericilik və digər aktların hazırlanmasında iştirak edib, pedaqoji və elmi fəaliyyətlə məşğuldur. Bakı Dövlət Universitetində “Hüquqşünaslıq” və “Beynəlxalq hüquq” üzrə magistrlik dissertasiyalarının müdafiəsi üzrə İxtisaslaşdırılmış Şuranın və Prezident yanında Dövlət İdarəçilik Akademiyasında hüquqşünaslıq ixtisasının magistratura səviyyəsi üzrə İxtisaslaşdırılmış Elmi Şuranın sədridir, Ali Attestasiya Komissiyasının Milli Aviasiya Akademiyası nəzdindəki ED 2.45 Dissertasiya Şurasının üzvüdür. Korrupsiyaya qarşı mübarizə üzrə Komissiyanın üzvüdür.

2009-cu ildə “Əməkdar hüquqşünas” fəxri adı alıb; 2018-ci ildə “Şöhrət” ordeni, 2019-cu ildə “Azərbaycan Xalq Cümhuriyyətinin 100 illiyi (1918–2018)”, 2024-cü ildə “Heydər Əliyevin 100 illiyi (1923–2023)” yubiley medalları, 2020-ci ildə Qazaxıstanın 2-ci dərəcəli “Dostluq” ordeni ilə təltif olunub. Ailəlidir, iki övladı var.

• 1975–1980 — M.V. Lomonosov adına Moskva Dövlət Universiteti, hüquq fakültəsi
• Hüquq elmləri doktoru