Yovanoviç: Almaniya üzərində qələbə xüsusi idi, amma qarşıda çox iş var

Yunanıstan millisinin baş məşqçisi İvan Yovanoviç UEFA Millətlər Liqasının III turunda Niderlanda qarşı keçirəcəkləri matç öncəsi komandasının hazırlığı barədə danışıb.

Yunanıstan millisi II turda səfərdə Almaniya yığmasını 1:0 hesabı ilə məğlub edib. Yovanoviç bu qələbənin xüsusi əhəmiyyət daşıdığını bildirib.

“Almaniya üzərində qələbə xüsusi idi, amma qarşıda bizi dörd oyun gözləyir və hələ çox iş görməliyik. Niderland oyunçularının keyfiyyəti, üslubu və sürəti sayəsində Avropanın ən yaxşı komandalarından biridir. Hesab edirəm ki, bu komandanı böyük gələcək gözləyir”, – baş məşqçi UEFA-nın saytına açıqlamasında deyib.

Yovanoviç qeyd edib ki, Yunanıstan millisi matçlarını həmişə dolu stadionlarda keçirir və bu amil futbolçular üçün böyük motivasiyadır.

Yunanıstan – Niderland qarşılaşması oktyabrın 1-də, cümə axşamı günü keçiriləcək. Görüş Bakı vaxtı ilə saat 22:45-də başlayacaq.