Qarşıdan gələn Novruz və Ramazan bayramları ilə əlaqədar Baş Dövlət Yol Polisi İdarəsi (BDYPİ) gücləndirilmiş iş rejimində fəaliyyət göstərəcək.
Bu barədə “Operativ Məlumat Mərkəzi-OMM” agentliyinə qurumdan rəsmi məlumat verilib.
Bayram günlərində ölkə ərazisində hərəkət intensivliyinin kəskin artacağını nəzərə alan BDYPİ bütün hərəkət iştirakçılarını maksimum diqqətli və məsuliyyətli olmağa çağırır. Bildirilir ki, yol hərəkəti zamanı verilən hər bir qərar insan həyatına birbaşa təsir edir və ən kiçik diqqətsizlik ağır nəticələrə səbəb ola bilər.
Təhlükəsizliyi təmin etmək üçün səfərə çıxarkən yol və hava şəraiti düzgün qiymətləndirilməli, nəqliyyat vasitələrinin texniki sazlığı əvvəlcədən mütləq yoxlanılmalıdır. Həmçinin, sürücülərdən müəyyən olunmuş sürət hədlərinə və təhlükəsiz ara məsafəsinə ciddi əməl etmələri tələb olunur.
Vətəndaşların rahatlığını və təhlükəsizliyini qorumaq məqsədilə yol polisi əməkdaşları tərəfindən xidmət gücləndirilmiş qaydada təşkil ediləcək. Xatırladaq ki, Azərbaycanda bu il 20-24 mart tarixlərində Novruz və Ramazan bayramları qeyd olunacaq.
