OMM Redaksiyası
“Sabah”ın müdafiəçisi Timoteuş Puxaç gələcəkdə Polşanın “Lex” klubuna qayıtmaq istədiyini açıqlayıb. O, bu barədə “Meczyki” nəşrinə müsahibəsində danışıb.
Jurnalistin “Lex”ə dönmək istəyib-istəmədiyi ilə bağlı sualını cavablandıran futbolçu bunu arzuladığını bildirib: “Əlbəttə, əlbəttə. Bunun üçün çalışacağam. “Lex” inanılmaz dərəcədə inkişaf edən klubdur. Bunu görmək çox xoşdur. Klub böhran yaşadığı vaxt orada çıxış edirdim. Birlikdə bu vəziyyətdən çıxdıq, gənc futbolçuların inkişafına kömək etdik və Avropa Liqasına vəsiqə qazandıq”.
Polşalı müdafiəçi İngiltərə Premyer Liqasında da özünü sınamaq istədiyini qeyd edib.
“Lex”in yetirməsi olan Puxaç klubun əsas komandasında 82 oyun keçirib, yeddi qol vurub və 12 məhsuldar ötürmə edib. 2021-ci ildə Berlin “Union”una transfer olunan futbolçu daha sonra “Trabzonspor”, “Panatinaikos”, “Kayzerslautern”, “Holşteyn Kil” və “Plimut”da çıxış edib. O, 2025-ci ildən “Sabah”ın formasını geyinir. Puxaçın Bakı klubu ilə müqaviləsi 2029-cu ilin ortalarına qədərdir.
