OMM Redaksiyası
“Xilasedici” kişi voleybol komandası CEV Çempionlar Liqasının ikinci təsnifat mərhələsinin cavab oyununda Portuqaliyada yerli “Sportinq”ə 3:2 hesabı ilə qalib gəlib. Bakıda keçirilən ilk görüşdə eyni hesabla məğlub olan Azərbaycan təmsilçisi növbəti mərhələyə qızıl setin nəticəsinə əsasən yüksəlib.
Azərbaycan millisinin üzvü Vüqar Bayramov gərgin keçən qarşılaşmada kollektivin yüksək əhval-ruhiyyə və qələbə əzmi ilə mübarizə apardığını bildirib. O, qələbədən sonra yorğunluq hiss olunduğunu, lakin komandanın diqqətini qarşıdakı matçlara yönəltməli olduğunu vurğulayıb.
“Bakıda keçirilən ilk oyunda 2:3 hesabı ilə məğlub olmuşduq. Cavab qarşılaşmasında əsas hədəfimiz yaxşı çıxış etmək və qələbə qazanmaq idi. Çətin mübarizəyə baxmayaraq, məqsədimizə çatdıq. Gərgin şəraitdə keçən qarşılaşmada sonadək mübarizə apararaq qalib gəldik. Beş set və qızıl setdən sonra yorğunluq hiss olunur”, – deyə Bayramov report.az-a açıqlamasında söyləyib.
Voleybolçu növbəti raundda da uğur qazanmağa çalışacaqlarını deyib. Bayramov rəqibin güclü olduğunu bildiklərini, əsas məqsədlərinin onu məğlub edib mübarizəni davam etdirmək olduğunu qeyd edib və komandadaşlarını qələbə münasibətilə təbrik edərək dəstək göstərənlərə təşəkkürünü çatdırıb.
Qızıl set 15:13 hesabı ilə başa çatıb.
