Afət Ziyadqızı
Ermənistan Prezidenti Vaaqn Xaçaturyan ölkəsinin Müstəqillik Günü münasibətilə xalqa müraciət edərək, dəyişən regional və qlobal təhlükəsizlik şəraitində dövlətçiliyin qorunub saxlanılması üçün çeviklik və güclü institutların vacibliyini vurğulayıb.
“Operativ Məlumat Mərkəzi-OMM” xəbər verir ki, bu barədə Ermənistan Prezidentinin mətbuat xidməti rəsmi məlumat yayıb.
Məlumata görə, Xaçaturyan 35 illik müstəqillik tarixinin keçirilən yolu dəyərləndirmək baxımından önəmli bir mərhələ olduğunu bildirib. Prezident qeyd edib ki, müstəqillik, suverenlik və azadlıq konyunktur dəyərlər deyil, hər bir vətəndaşın və dövlətin üzərinə düşən əsas məsuliyyətdir.
İyun ayında keçirilən parlament seçkilərinə də toxunan dövlət başçısı ölkədə demokratik proseslərin davam etdiyini diqqətə çatdırıb. Xaçaturyan əlavə edib ki, dəyişən iqtisadi və geosiyasi reallıqlara müqavimət göstərmək üçün Ermənistan öz prinsipiallığını saxlayaraq çevik xarici siyasət yürütməli, gələcək nəsillərə tam suveren və fəaliyyət qabiliyyətli bir dövlət həvalə etməlidir.
