OMM Redaksiyası
“Red Bull” komandasının pilotu Maks Verstappen Formula-1-də bir komandanın heyətində qazandığı qələbələrin sayına görə Mixael Şumaxeri qabaqlayıb.
Niderlandlı sürücü bazar günü Sinqapur Qran-prisinin qalibi olub. Bu nəticə Verstappenin “Red Bull”la qazandığı 73-cü qələbə kimi qeydə alınıb.
Formula-1 əfsanəsi Mixael Şumaxer “Ferrari”nin pilotu kimi 72 yarışda birinci yeri tutub. Beləliklə, Verstappen eyni komanda ilə qazanılan qələbələrin sayında almaniyalı sürücünü geridə qoyub.
Bu göstəricidə ilk pillədə yeddiqat dünya çempionu Lyuis Hemilton qərarlaşıb. O, “Mercedes”in sükanı arxasında 84 qələbə qazanıb. Verstappenin Sinqapurdakı uğuru siyahıda Şumaxerdən yuxarı yüksəlməsinə imkan versə də, Hemiltonun nəticəsi hələ də lider olaraq qalır.
