OMM Redaksiyası
2026-cı il Formula-1 üzrə Azərbaycan Qran-prisi “Red Bull”un mövsümündə dönüş nöqtəsinə çevrilib. İspaniyanın “Mundo Deportivo” nəşrinin məlumatına görə, komanda Bakı mərhələsində mövsümün son böyük texniki yeniliklər paketini təqdim edib.
Aerodinamikaya aid beş yenilikdən ibarət paket çempionatın ilk yarısında problemlərlə üzləşən komandanın gözləntilərini üstələyib. Əsas dəyişiklik bolidin döşəməsinin yeni konstruksiyası olub. Bu yenilik yerəbasma qüvvəsini artırıb və aerodinamik sabitliyi yaxşılaşdırıb. Təkmilləşdirmələr yan pontonlara və arxa görüntü güzgülərinə də tətbiq edilib.
Bakıda sıralanma turunda mühərrik problemi yaşayan Maks Ferstappen yarışda səkkizinci yerdən ikinci pilləyə yüksəlib. Niderlandlı pilot finiş xəttini qalibdən 0,2 saniyə geri keçib.
Daha sonra Ferstappen Malayziya və Sinqapur Qran-prilərində qalib gəlib. Sinqapurda o, həm sprint, həm də əsas yarışda birinci olub və hər iki yarışda poul mövqeyini qazanıb.
“Düşünürəm ki, Bakıdan etibarən bolid özünü daha yaxşı aparmağa başladı. Balans xeyli yaxşılaşdı. İlin əvvəlində bolidi idarə etmək bəzən hətta bir qədər qorxulu olurdu. İndi isə pilotajdan daha çox zövq alıram”, – deyə Ferstappen Sinqapur Qran-prisindən sonra bildirib.
“Mundo Deportivo”nun qiymətləndirməsinə görə, yeniliklər Ferstappenin 2026-cı ildə çempionluq uğrunda mübarizəsi üçün gec tətbiq edilsə də, 2027-ci il mövsümünə hazırlıq baxımından komandaya texniki təməl yaradıb.
Kontekst
Xatırladaq ki, sentyabrın 26-da Bakıda keçirilən Azərbaycan Qran-prisini “Mercedes” pilotu Corc Rassell qazanıb. Ferstappen yarışı ikinci pillədə başa vurub.
