Afət Ziyadqızı
Venesuelada iyunun 24-də baş verən ikiqat zəlzələ nəticəsində ölənlərin sayı 3811 nəfərə çatıb.
“Operativ Məlumat Mərkəzi-OMM” xəbər verir ki, ölkə Milli Assambleyasının sədri Xorxe Rodriqes çərşənbə günü açıqlamasında təbii fəlakətin nəticələrinin ilkin məlumatlardan daha ağır olduğunu bildirib.
Rəsmi məlumatlara əsasən, zəlzələ nəticəsində 16 740 nəfər xəsarət alıb, 17 907 nəfər isə yaşayış yerini itirib.
Venesuelanın müvəqqəti prezidenti Delsi Rodriqes ölkəyə qarşı tətbiq edilən beynəlxalq sanksiyaların aradan qaldırılması ilə bağlı çağırışını yeniləyib.
Dövlət televiziyası “VTV” vasitəsilə çıxış edən Rodriqes bildirib ki, xaricdə dondurulmuş Venesuela aktivlərinin geri qaytarılması ölkənin bərpa prosesində mühüm rol oynaya bilər.
Onun sözlərinə görə, həmin vəsaitlər yenidənqurma işlərinə, məşğulluq və təhsil proqramlarının maliyyələşdirilməsinə yönəldilə bilər.
Qeyd edək ki, ABŞ, Avropa İttifaqı və bir sıra digər ölkələr son iyirmi il ərzində Venesuelaya qarşı müxtəlif sanksiyalar tətbiq edib. Bu tədbirlər əsasən demokratik institutların zəiflədilməsi və narkotik ticarəti ilə bağlı ittihamlarla əlaqələndirilib.
ABŞ tərəfindən bu ilin yanvarında prezident Nikolas Maduronun saxlanılmasından sonra Venesuelanın neft sektoruna müəyyən məhdud güzəştlər verilsə də, sanksiyaların əsas hissəsi qüvvədə qalır.
Delsi Rodriqes Böyük Britaniya kralı III Çarlza müraciət edərək, İngiltərə Bankında saxlanılan Venesuelaya məxsus qızıl ehtiyatlarının geri qaytarılmasını istəyib.
Məlumata görə, dəyəri təxminən 1,95 milyard dollardan 5 milyard dollara qədər qiymətləndirilən qızıl ehtiyatları uzun müddətdir Britaniya məhkəmələrində hüquqi mübahisə predmeti olaraq qalır.
Rodriqes bildirib ki, bu qızıl Venesuela xalqına məxsusdur və zəlzələnin ağır nəticələrinin aradan qaldırılması üçün istifadə edilməlidir.
O, həmçinin Beynəlxalq Valyuta Fondunun (IMF) rəhbəri ilə ölkəyə maliyyə dəstəyinin ayrılması məsələsini müzakirə etdiyini açıqlayıb.
