Afət Ziyadqızı
Venesuelanın müvəqqəti dövlət başçısı Delsi Rodrigez ölkədə seçkilərin keçirilməsinin qaçılmaz olduğunu, lakin prosesin ölkənin tam hazır olduğu şəraitdə baş tutacağını bildirib.
"Operativ Məlumat Mərkəzi-OMM" xəbər verir ki, bu barədə "Miraflores" sarayında keçirilən mətbuat konfransında Delsi Rodrigez açıqlama verib.
Rodrigez yanvarın 5-də vəzifəsinin icrasına başladığı gündən etibarən ölkənin gələcəyi üçün intensiv fəaliyyət göstərdiyini vurğulayıb.
O qeyd edib ki, Venesuelanın vaxtı gəldikdə seçki qutularına getməyə tam hazır olması üçün fasiləsiz çalışır.
Müvəqqəti dövlət başçısı ölkədə demokratik sabitliyin bərqərar olması və Venesuelaya qarşı tətbiq edilən sanksiyaların aradan qaldırılması üçün intensiv diplomatik danışıqlar apardıqlarını diqqətə çatdırıb.
Seçkilərin keçiriləcəyi tarixin müəyyən edilməsi ilə bağlı sualları cavablandıran Rodrigez bu qərarın şəxsi iradəsindən asılı olmadığını bildirib.
O, Venesuelada qüvvədə olan Konstitusiyanın və onun təmin etdiyi demokratik nizamın mövcud olduğunu vurğulayıb.
Rodrigez seçkilərin keçiriləcəyini bir daha təsdiqləsə də, onların dəqiq tarixini açıqlamayıb.
