Parlamentdəki "Güclü Ermənistan" fraksiyasının rəhbəri Narek Karapetyan və partiya üzvü Aleksan Aleksanyana qarşı cinayət işi üzrə ibtidai istintaq başa çatıb.
“Operativ Məlumat Mərkəzi-OMM” Ermənistan mediasına istinadən xəbər verir ki, iş ittiham aktı ilə birlikdə Korrupsiyaya Qarşı Mübarizə Məhkəməsinə göndərilib.
İstintaqın məlumatına görə, Karapetyan və Aleksanyan digər şəxslərlə birlikdə cinayətkar təşkilat yaradıb və ona rəhbərlik ediblər. Bu şəxslər dövlətə xüsusilə külli miqdarda ziyan vurulması ilə nəticələnən qeyri-qanuni fəaliyyətlərini gizlətmək üçün yaradılmış "Bizim tərzdə" ictimai təşkilatından istifadə ediblər.
Bundan əlavə, onlara xidməti səlahiyyətlərindən və bununla bağlı nüfuzlarından istifadə etməklə külli miqdarda pul vəsaitlərinin leqallaşdırılması (yuyulması), həmçinin 2025-2026-cı illərdə vətəndaşların yığıncaqlarda iştirakı üçün maddi cəhətdən stimullaşdırılması ittihamı irəli sürülüb.
İstintaqın versiyasına görə, Karapetyan və Aleksanyanın qeyri-qanuni fəaliyyəti Ermənistan parlamentinə 2026-cı il iyunun 7-nə təyin edilmiş seçkilərlə əlaqədar olub. Onların hərəkətləri seçki prosesinin gedişinə təsir göstərməyə, "Güclü Ermənistan" partiyasının və sonradan formalaşdırılmış eyniadlı alyansın dəstəklənməsi üçün daha çox səs toplanmasına kömək etməyə, eləcə də bu siyasi qüvvəyə geniş ictimai dəstək illüziyası yaratmağa yönəlib.
Xüsusilə, istintaq materiallarında qeyd olunub ki, 2025-ci ilin sentyabrından 2026-cı ilin fevralınadək Ermənistanın müxtəlif yaşayış məntəqələrində "Bizim tərzdə" ictimai təşkilatının 114 ofisi açılıb. İttiham tərəfinin versiyasına görə, bu məkanlardan faktiki olaraq "Güclü Ermənistan" partiyasının fəaliyyətinin təşkili üçün, o cümlədən partiya ofisləri və seçkiqabağı qərargahlar kimi istifadə olunub.
Aleksanyan 2026-cı il iyunun 3-dən həbsdədir. Karapetyan barəsində isə ölkədən çıxışa qadağa və girov şəklində qətimkan tədbiri seçilib.
