Ermənistanda müxalifətçi siyasətçinin tərəfdarı həbs olunub

Ermənistan İstintaq Komitəsinin məlumatına əsasən, “Güclü Ermənistan” blokunun lideri Samvel Karapetyanın yaxın tərəfdarı Alik Aleksanyan saxlanılıb. Məhkəmənin qərarı ilə o, iki ay müddətinə həbs edilib. Aleksanyana qarşı külli miqdarda pul vəsaitlərinin yuyulması və seçicilərin rüşvət yolu ilə ələ alınması kimi ciddi ittihamlar irəli sürülüb.

İstintaq orqanlarının qənaətinə görə, “Po-svoyemu” ictimai təşkilatının təsisçisi və icraçı direktoru olan Aleksanyan 2025-ci ilin oktyabrından 2026-cı ilin martınadək olan müddətdə “Tashir” fondundan təxminən 4,4 milyon dollar və 230 min avro vəsait alıb. İstintaq bu vəsaitlərin hədiyyə və ya kredit adı altında rəsmiləşdirildiyini, lakin əslində “Güclü Ermənistan” blokuna dəstək verən vətəndaşlara ödənişlər edilərək gizli seçici rüşvəti kimi istifadə olunduğunu ehtimal edir.

Qeyd edək ki, daha əvvəl “Güclü Ermənistan” blokunun rəhbəri Samvel Karapetyan siyasi qüvvənin 500-ə yaxın üzvü və tərəfdarının 30-40-a yaxın cinayət işi çərçivəsində saxlanıldığını bildirmişdi. Karapetyan hakimiyyəti müxalifətə qarşı inzibati resurslardan istifadə etməkdə və təzyiqlər göstərməkdə günahlandırır.