Afət Ziyadqızı
Türkiyənin Ailə və Sosial Xidmətlər naziri Mahinur Özdemir Göktaş meşə yanğınlarından zərər çəkən bölgələrə dövlət dəstəyinin davam etdiyini açıqlayıb.
“Operativ Məlumat Mərkəzi-OMM” xəbər verir ki, Aydın, Balıkesir, Antalya və Muğla vilayətlərində baş verən meşə yanğınlarından sonra dövlətin bütün imkanları səfərbər olunub.
Nazir bildirib ki, əsas məqsəd zərərçəkmiş ərazilərdə həyatın qısa müddətdə normallaşdırılması və vətəndaşların ehtiyaclarının qarşılanmasıdır.
Bildirilib ki, ilkin ehtiyacların ödənilməsi məqsədilə sözügedən bölgələrə ümumilikdə 25 milyon türk lirəsi məbləğində vəsait ayrılıb.
Qeyd olunub ki, Sosial Yardımlaşma və Həmrəylik Fondları vasitəsilə zərərçəkmiş ailələrə baş çəkilir, dəymiş ziyanın qiymətləndirilməsi istiqamətində işlər davam etdirilir.
Mahinur Özdemir Göktaş dövlət qurumlarının zərərçəkmiş vətəndaşların yanında olmağa davam edəcəyini bildirib, yanğınlardan zərər görənlərə keçmiş olsun arzularını çatdırıb.
