Türkiyənin xarici işlər naziri Hakan Fidan ilə İranın xarici işlər naziri Abbas Əraqçi arasında telefon danışığı baş tutub.
"Operativ Məlumat Mərkəzi-OMM" xəbər verir ki, danışıq zamanı rəsmi Ankara İrandan atılan və Türkiyənin hava məkanına doğru istiqamət alan ballistik raketlə bağlı kəskin etirazını bildirib.
"Reuters" agentliyinin diplomatik mənbələrə istinadən yaydığı məlumata görə, Hakan Fidan iranlı həmkarına bu cür halların qəbulolunmaz olduğunu vurğulayıb.
Nazir qeyd edib ki, Tehran regionda münaqişəni daha da alovlandıra biləcək hər hansı addımdan çəkinməlidir.
Türkiyə tərəfi İran ərazisindən atılan mərmini vaxtında aşkar edərək zərərsizləşdirib. Rəsmi Ankara hadisə ilə bağlı Tehrana ciddi xəbərdarlıq ünvanlayıb. Türkiyə Milli Müdafiə Nazirliyi raketin Türkiyə hava məkanına daxil olmadan öncə ələ keçirildiyini təsdiqləyib.
Xatırladaq ki, bundan əvvəl Türkiyə Müdafiə Nazirliyi İrandan buraxılan ballistik mərminin ölkə sərhədlərinə yaxınlaşarkən zərərsizləşdirilməsi barədə rəsmi məlumat yaymışdı.
