OMM Redaksiyası
Türkiyə tərəfi Ermənistanla sərhəddə yerləşən keçid məntəqəsinin açılması istiqamətində işləri sürətləndirib.
"Operativ Məlumat Mərkəzi-OMM" yerlik KİV-ə istinadən xəbər verir ki, İğdır valisi Fırat Taşolar "Alican" (Ermənistan tərəfdən "Marqara") sərhəd-keçid məntəqəsində aparılan yenidənqurma və modernləşdirmə işləri ilə şəxsən tanış olub.
Vali texniki qrupun müşayiəti ilə sərhəd boyu keçid marşrutlarına və binalara baxış keçirib.
Rəsmi şəxs vurğulayıb ki, bərpa işlərinin qısa müddətdə yekunlaşdırılması planlaşdırılır.
Qeyd edək ki, Türkiyə və Ermənistan arasında diplomatik münasibətlər yoxdur və sərhədlər 1993-cü ildən Ankara tərəfindən bağlanıb. İki ölkə arasındakı mürəkkəb münasibətlər Ankaranın Qarabağ məsələsində Azərbaycanın mövqeyini dəstəkləməsi və digər tarixi ziddiyyətlərlə bağlıdır.
Münasibətlərin normallaşdırılması prosesi çərçivəsində 2022-ci ilin yanvarından xüsusi nümayəndələr — Ruben Rubinyan və Serdar Kılıç arasında Moskva və Vyanada bir neçə görüş keçirilib. 2022-ci ilin iyulunda tərəflər üçüncü ölkə vətəndaşları və diplomatik pasport sahibləri üçün quru sərhədinin açılması barədə razılığa gəlsələr də, bu razılaşma hələ ki, reallaşmayıb.
