Afət Ziyadqızı
ABŞ Prezidenti Donald Tramp Texasda keçirilən tərəfdarlarının mitinqində çıxışı zamanı maraqlı anlarla yadda qalıb. Avtomobillərdə yanacağa qənaət prinsipini əyani göstərməyə çalışan ABŞ lideri səhnədə stəkandakı suyu yerə töküb.
"Operativ Məlumat Mərkəzi-OMM" xəbər verir ki, "Forbes Breaking News" kanalı tərəfindən yayımlanan çıxışında D.Tramp Co Bayden administrasiyası dövründə tətbiq olunmuş avtomobil ekoloji standartlarının ləğv edilməsindən danışıb.
O bildirib ki, əvvəlki tələblər avtomobil istehsalçılarını cüzi miqdarda yanacağa qənaət etmək üçün mühərriklərə lazımsız elektron sistemlər və əlavə kompüterlər quraşdırmağa məcbur edirdi.
"Əlimdə bir stəkan su var... Bu qədər yanacağa qənaət etmək üçün mühərrikə üç kompüter quraşdırmalı olursan", - deyə Tramp bildirərək fikrini əyani sübut etmək üçün stəkandakı suyu səhnəyə axıdıb. ABŞ prezidenti ölkəsinin zəngin neft ehtiyatlarına malik olduğunu və belə lazımsız məhdudiyyətlərə ehtiyac qalmadığını vurğulayıb.
Digər tərəfdən, Rusiya Prezidenti Vladimir Putin bir müddət əvvəl verdiyi bəyanatda Ukraynadakı münaqişənin nizamlanması istiqamətində göstərdiyi vasitəçilik səylərinə və diplomatik təşəbbüslərinə görə ABŞ Prezidentinə təşəkkürünü bildirib.
