OMM Redaksiyası
ABŞ Prezidenti Donald Tramp respublikaçıların noyabrda keçiriləcək aralıq seçkilərində Nümayəndələr Palatası və Senatda çoxluğu qoruyacağı təqdirdə hər bir yetkin amerikalıya 5 min dollar ödəniləcəyini vəd edib.
Tramp bu barədə Texas ştatının Dallas şəhərində keçirilən Respublikaçılar Partiyasının aralıq seçki qurultayında çıxış edərkən danışıb. O, “Tramp dividendi” adlandırdığı ödənişin ABŞ iqtisadiyyatının gücü hesabına maliyyələşdiriləcəyini deyib.
Prezidentin sözlərinə görə, vəsait ABŞ ərazisində xərclənməlidir. Lakin planın digər detalları açıqlanmayıb və onun praktikada necə həyata keçiriləcəyi məlum deyil.
Tənqidçilər bildirirlər ki, belə bir ödəniş inflyasiya təzyiqlərini artıra bilər. Hər hansı ödənişin həyata keçirilməsi üçün Konqresin təsdiqi tələb olunur.
Analitiklərin hesablamalarına görə, təşəbbüsün dəyəri 1 trilyon dollardan çox ola bilər. Bu isə ABŞ-ın milli borcunun 40 trilyon dolları keçdiyi və illik büdcə kəsirinin təxminən 1,8 trilyon dollar olduğu bir vaxta təsadüf edir.
Respublikaçılar Partiyasının aralıq seçkilərdə çətinliklə üzləşəcəyi gözlənilir. ABŞ prezidentlərinin partiyaları tarixən aralıq səsvermələrində Konqresdə mandat itiriblər. Tramp isə bu tendensiyanın qarşısını almaq istədiyini bildirib.
Təklif tamamilə yeni deyil. Tramp bu ilin əvvəlində 2 min dollarlıq daha kiçik ödəniş ideyasını irəli sürmüş və Konqresin təsdiqinin vacib olmaya biləcəyini demişdi. Ötən il isə o, ABŞ hərbçilərinə 1 776 dollar ödənilməsinə icazə vermiş və bunu “döyüşçü dividendi” adlandırmışdı.
Ohayo ştatından respublikaçı senator Berni Moreno bildirib ki, respublikaçılar Konqresə nəzarəti saxlayacağı təqdirdə, 3 noyabr seçkilərindən sonra dividendin sürətlə qəbul edilməsi üçün qanun layihəsi hazırlayacaq. Demokratlar hələlik təklifə birbaşa münasibət bildirməyiblər.
