OMM Redaksiyası
Donald Tramp administrasiyası növbəti 12 ay ərzində ABŞ-a qəbul ediləcək qaçqınların sayını 17 500 nəfərlə məhdudlaşdırmağı planlaşdırır. ABŞ Konqresinə sentyabrın 22-də göndərilən bildirişə əsasən, bu proqramda əsasən Cənubi Afrikadan olan ağdərili afrikanerlərin yer alacağı gözlənilir.
ABŞ Prezidenti Donald Tramp afrikanerlərin Cənubi Afrikada irqlərinə görə təqiblə üzləşdiyini iddia edib. Cənubi Afrika hökuməti isə bu ittihamları rədd edib.
Qaçqın proqramında dəyişiklik
Tramp 2025-ci ilin yanvarında vəzifəyə başladıqdan sonra ABŞ-ın qaçqın qəbulu proqramını dayandırıb. O, qəbulların yalnız ölkənin maraqlarına uyğun olduğu halda bərpa ediləcəyini bildirib. Bir neçə həftə sonra administrasiya afrikanerlərin ABŞ-a gətirilməsi ilə bağlı təşəbbüsə başlayıb. Bu addım qaçqın hüquqları müdafiəçilərinin tənqidinə səbəb olub.
Dövlət Departamentinin bildirişində qeyd olunub ki, “Cənubi Afrikadan olan afrikanerlərin vergi ödəyicilərinin resurslarını qoruyacaq şəkildə ABŞ cəmiyyətinə tam inteqrasiya olunacağı gözlənilir”.
Sənədə əsasən, təklif edilən qaçqın kvotasının həyata keçirilməsi təxminən 500 milyon dollara başa gələ bilər.
Qaçqınların böyük hissəsi Cənubi Afrikadandır
2026-cı il sentyabrın 30-da başa çatacaq cari maliyyə ili ərzində ABŞ-a təxminən 3 000 nəfər qaçqın qəbul edilib. Dövlət Departamentinin avqusta qədər olan məlumatlarına görə, onların üçündən başqa hamısı Cənubi Afrika vətəndaşı olub.
Müqayisə üçün, Prezident Co Baydenin administrasiyası 2024-cü maliyyə ilində onlarla ölkədən 100 mindən çox qaçqın qəbul etmişdi.
“Global Refuge” təşkilatının prezidenti və baş icraçı direktoru Kriş O’Mara Vignarajah təklif olunan siyasəti tənqid edib. O bildirib ki, qaçqın proqramının yalnız bir qrupa yönəldilməsi ABŞ-ın humanitar liderliyini zəiflədə və digər həssas ailələri dəstəkdən məhrum edə bilər.
