Afət Ziyadqızı
Yaponiyanın paytaxtı Tokioda sentyabrın əvvəlindən etibarən qeyri-adi hava şəraiti müşahidə olunur. Yaponiya Meteorologiya Agentliyinin məlumatına görə, sentyabrın əvvəlindən bazar ertəsinə qədər şəhərin mərkəzinə 629 millimetr yağış düşüb. Bu göstərici normadan təxminən üç dəfə çoxdur.
“Operativ Məlumat Mərkəzi-OMM” xəbər verir ki, bu barədə “Mainichi Shimbun” və “Sankei Shimbun” qəzetləri məlumat yayıb.
“Mainichi Shimbun”un yazdığına görə, həmin dövrdə Tokioda günəş işığının müddəti cəmi 45,8 saat təşkil edib. Bu, müşahidələr tarixində ikinci ən aşağı göstəricidir. Paytaxtda 14 gün ərzində günəş görünməyib.
Paytaxtdakı klinikalardan birinin direktoru, həkim Hiromiçi İto “Sankei Shimbun”a açıqlamasında hava şəraitinin insanların fiziki və psixoloji sağlamlığına təsir göstərdiyini bildirib.
Onun sözlərinə görə, uzunmüddətli yağış, atmosfer təzyiqinin aşağı düşməsi və yüksək rütubət baş ağrısı, başgicəllənmə və digər simptomlara səbəb ola bilər.
Çərşənbə günü səhər yağış zəif çiskinə çevrilsə də, daha çox yağıntının düşə biləcəyi ehtimal olunur. Mütəxəssislər bunu bu il “El Niño” hadisəsinin Sakit okeanı isitməsi və iqlim böhranının ekstremal hava şəraitini gücləndirməsi ilə əlaqələndirirlər.
Yaponiya Meteorologiya Agentliyinin rəsmisi Masayuki Kyoda payız yağış cəbhələrinin ölkədə normadan daha uzun müddət qaldığını qeyd edib.
Tokionun yağışlı mövsümü adətən iyun ayında baş verir. Lakin yay boyu davam edən leysanlar bölgənin bəzi hissələrində ciddi daşqınlara səbəb olub.
Bu ayın əvvəlində “Dujuan” tayfunu qonşu Çiba prefekturasında daşqın və torpaq sürüşmələrinə səbəb olub. Nəticədə səkkiz nəfər ölüb, onlarla ev dağılıb.
Meteoroloqlar mövsümün 26-cı tayfununun şimal-şərq istiqamətində hərəkət etdiyini və Tokionun da yerləşdiyi Kanto bölgəsinin yaxınlığından keçə biləcəyini bildiriblər.
Kyoda iqlim dəyişikliyi ilə Tokioda 1886-cı ildən aparılan müşahidələr ərzində qeydə alınan ən uzunmüddətli yağış dövrü arasında birbaşa əlaqə yaratmağın çətin olduğunu deyib. Bununla belə, agentliyin son hesabatında qlobal istiləşmənin uzunmüddətli perspektivdə Yaponiyanın hava şəraitinə, o cümlədən yağıntıların artmasına təsir etdiyi vurğulanıb.
Tokioda bundan əvvəl ən uzun fasiləsiz yağış dövrü 27 iyun–29 iyul 2019-cu il tarixlərində qeydə alınıb və 33 gün davam edib.
Yerli medianın məlumatına görə, uzunmüddətli yağışlar Tokio ətrafındakı kənd təsərrüfatı rayonlarında məhsula zərər vurub. Bu səbəbdən, xüsusilə yarpaqlı tərəvəzlərin qiyməti yüksəlib.
Paytaxtdakı supermarketlərdən birinin əməkdaşı kahının qiymətinin iki dəfədən çox artaraq 450 yenə, yəni təxminən 2,17 funt-sterlinqə çatdığını bildirib.
