OMM Redaksiyası
ABŞ-nin Texas ştatında dizel yanacağının qiymətlərinin rekord həddə yüksəlməsi fonunda fövqəladə vəziyyət elan edilib.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Texas qubernatoru Qreq Ebbott bildirib ki, Texasın kənd təsərrüfatı və yükdaşıma sektorları dizel yanacağından ciddi şəkildə asılıdır və rekord qiymətlər hər iki sahə üçün risk yaradır, eyni zamanda ştat sakinlərinin xərclərini artırır.
"İndi fermerlər və yük maşını sürücüləri Texas yollarında boyalı dizel yanacağından istifadə edə biləcəklər", - qubernator bildirib.
Qeyd edək ki, boyalı dizel yanacağından əsasən kənd təsərrüfatında istifadə olunur və o, motor yanacağı vergisindən azaddır. Texas qanunvericiliyinə əsasən, bu yanacağın ümumi istifadədə olan yollarda istifadəsi qadağandır. Lakin qubernatorun qərarı ilə bu məhdudiyyət və onunla bağlı cərimələr müvəqqəti olaraq aradan qaldırılıb.
Amerika Avtomobil Assosiasiyasının məlumatına görə, ABŞ-də dizel yanacağının qiyməti sentyabr ayında kəskin artmağa başlayıb.
Bir il əvvəl Texasda dizelin bir qallonunun (təxminən 3,8 litr) orta qiyməti 3,16 dollar olduğu halda, sentyabrın 19-da bu göstərici rekord həddə - 5,97 dollara yüksəlib.
