Afət Ziyadqızı
Portuqaliyanın "Sportinq" klubu transfer bazarında fəaliyyətini davam etdirir və heyətini gücləndirmək üçün yeni addım atmağa hazırlaşır.
"Operativ Məlumat Mərkəzi-OMM" xəbər verir ki, Lissabon təmsilçisi İspaniyanın "Betis" klubunun yarımmüdafiəçisi Serxi Altimiranın transferi ilə bağlı danışıqlarda irəliləyiş əldə edib.
Məlumata görə, tərəflər arasında aparılan müzakirələr son mərhələyə yaxınlaşıb. Transfer prosesinin sürətləndirilməsinin əsas səbəbi isə Almaniyanın "RB Leyptsiq" klubunun da futbolçu ilə maraqlanmasıdır.
Bildirilib ki, "Sportinq" rəhbərliyi rəqiblərini qabaqlamaq məqsədilə danışıqları intensivləşdirib. Məlumatlara əsasən, 24 yaşlı ispaniyalı yarımmüdafiəçi Portuqaliya klubuna keçidə müsbət yanaşır.
Qeyd olunub ki, Serxi Altimira ötən mövsüm ərzində klub səviyyəsində 40 oyunda meydana çıxıb. Futbolçu həmin qarşılaşmalarda 2 qol vurub və 3 məhsuldar ötürmə ilə yadda qalıb.
Məlumata əsasən, "Transfermarkt" portalı yarımmüdafiəçinin bazar dəyərini 20 milyon avro olaraq qiymətləndirir. Transferlə bağlı yekun qərarın yaxın günlərdə açıqlanacağı gözlənilir.
