Afət Ziyadqızı
Sloveniyanın müxalif Sosial Demokratlar Partiyası İsraillə diplomatik münasibətlərin sürətlə inkişaf etdirilməsi və ölkənin xarici siyasətində kəskin dönüşün edilməsi səbəbilə xarici işlər naziri Anje Loqar barəsində impiçment təşəbbüsü irəli sürəcəyini bəyan edib.
“Operativ Məlumat Mərkəzi-OMM” xəbər verir ki, bu barədə Sloveniya mətbuatı müxalifət partiyalarının rəsmi bəyanatlarına istinadən məlumat yayıb.
Məlumata görə, təşəbbüsə keçmiş baş nazir Robert Qolobun rəhbərlik etdiyi Azadlıq Hərəkatı və Sol Partiya tərəfindən də tam dəstək veriləcəyi bildirilib.
Anje Loqarın xarici işlər idarəsinə rəhbərliyi dövründə Baş nazir Yanez Yanşanın koalisiya hökuməti öncəki liberal kabinetin İsrailə kəskin mövqeyini geridə qoyaraq yeni kurs müəyyənləşdirib. Sloveniya hökuməti Avropa İttifaqının Şərqi Qüdsdəki qanunsuz E1 məskunlaşma layihəsinə qarşı hazırladığı birgə sənədə veto qoyub.
Bu addımlardan sonra İsrail rəhbərliyi Lyublyanada ilk dəfə daimi səfirlik açıb. Səfirliyin açılış mərasimində iştirak etmək üçün Sloveniyaya gələn İsrailin xarici işlər naziri Gideon Saar rəsmi görüşlər keçirib. Səfər paytaxtda minlərlə etirazçının iştirak etdiyi aksiya ilə müşayiət olunub.
Azadlıq Hərəkatının rəhbəri Robert Qolob hökuməti İsrail rəhbərliyinin maraqlarını milli suverenlikdən üstün tutmaqda tənqid edib. Qolobun hakimiyyəti dövründə Sloveniya Qəzzadakı hərbi əməliyyatlara cavab olaraq İsraillə münasibətləri ən aşağı səviyyəyə endirmiş, Fələstin dövlətini rəsmən tanımışdı. Mövcud hökumət isə əvvəlki məhdudiyyətləri ləğv edərək Tel-Əvivlə dialoqu normallaşdırmaq xəttini davam etdirir.
