Şimali Avropada yeni qorxu! Norveç işğal edilə bilər?

"Rusiyanın Norveçə qarşı Ukraynadakı kimi genişmiqyaslı işğal planı olmasa da, nüvə potensialını təhlükəsizliyə almaq məqsədilə ərazi qazanmaq variantı masadadır".

"Operativ Məlumat Mərkəzi-OMM" xəbər verir ki, bunu Norveç Silahlı Qüvvələrinin Baş Qərargah rəisi Eirik Kristoffersen "The Guardian" nəşrinə müsahibəsində deyib.

Kristoffersen qeyd edib ki, Rusiyanın nüvə arsenalının böyük hissəsi Norveç sərhədinə yaxın olan Kola yarımadasında yerləşir.

Baş Qərargah rəisi vurğulayıb ki, bu hərbi elementlər NATO ilə mümkün münaqişədə kritik rol oynaya bilər. Norveç tərəfi ənənəvi işğal ssenariləri ilə yanaşı, sabotaj və hibrid təhdidlərə qarşı da hazırlıqlarını artırır.

Müsahibə zamanı Kristoffersen ABŞ prezidenti Donald Tramp tərəfindən səsləndirilən bəzi fikirləri də tənqid edib.

O, Donald Trampın Əfqanıstanda NATO müttəfiqlərinin ön cəbhədə olmadığı barədə iddialarını qəbuledilməz adlandırıb.

Sonda komandan Oslo və Moskva arasında axtarış-xilasetmə sahəsində məhdud hərbi təmasların davam etdiyini bildirib. Yanlış anlaşılmaların qarşısını almaq üçün tərəflər arasında birbaşa rabitə kanalının qurulması təklif edilib.